ភ្នំពេញ៖ អង្គការជំនួយនៃក្តីសង្ឃឹមសម្រាប់សហគមន៍ (HHC) បានគាំទ្រដល់ការធ្វើវិសោធនកម្មរដ្ឋធម្មនុញ្ញ និងបានឆ្លើយតបទៅមនុស្សមួយចំនួនដែលប្រឆាំងនឹងវិសោធនកម្មនេះថាមិនបានសិក្សាស្វែងយល់ឲ្យគ្រប់ជ្រុងជ្រោយ។

ក្នុងញាត្តិចុះថ្ងៃសុក្រ ទី២៩ ខែកក្កដា HHC បានថ្កោលទោសចំពោះមនុស្សមួយចំនួន ដែលបានលើកឡើងនូវគំនិតអវិជ្ជមានចំពោះការធ្វើវិសោធនកម្មនេះ ដោយថាជាការលើកឡើងដោយគ្មានមូលដ្ឋានច្បាស់លាស់ មិនត្រឹមត្រូវ តាមខ្លឹមសារពិតប្រាកដនៃវិសោធនកម្ម។

ក្នុងញត្តិគាំទ្រនោះលើកឡើងថា៖ «យើងខ្ញុំទាំងអស់គ្នា សូមគាំទ្រជាឱឡារឹកចំពោះការធ្វើវិសោធនកម្មរដ្ឋធមនុញ្ញលើកទី១០ និងមានក្តីសង្ឃឹមប្រកបដោយគំនិតសុទ្ធិដ្ឋិនិយម និងទស្សទានវិជ្ជមានគ្រប់ស្ថាប័នជាតិទាំងអស់ និងបន្តអនុវត្តយ៉ាងពេញលេញនូវរដ្ឋធម្មនុញ្ញ ជាពិសេសសូមបន្តគាំទ្រនិងចូលរួមថែរក្សាការសន្តិសុខ សុភាព ក្រោមការដឹកនាំរបស់រាជរដ្ឋាភិបាលកម្ពុជា ដើម្បីធានានូវសុខសន្តិភាព ស្ថេរភាពនយោបាយប្រជាធិបត្តេយ្យ និងការអភិវឌ្ឍនៅកម្ពុជា»។

គួរឲ្យដឹងផងដែរថា រដ្ឋសភាកម្ពុជាបានសម្រេចអនុម័តទាំងស្រុងធ្វើវិសោធនកម្មលើកទី១០ នៃរដ្ឋធម្មនុញ្ញកម្ពុជាបន្ទាប់ពីបើកសម័យប្រជុំពេញអង្គលើកទី៧ នីតិកាលទី៦ ថ្ងៃព្រហស្បតិ៍ ទី២៨ ខែកក្កដា ឆ្នាំ២០២២ ដោយសំឡេង១០៥ លើ១០៦សំឡេង។

បន្ទាប់ពីច្បាប់នេះត្រូវបានអនុម័តរដ្ឋសភានឹងបញ្ជូនទៅកាន់ព្រឹទ្ធសភាដើម្បីបន្តប្រជុំយល់ព្រម មុននឹងបញ្ជូនទៅអង្គព្រះមហាក្សត្រដើម្បីឡាយព្រះហស្ថលេខាដាក់ឱ្យប្រើប្រាស់ជាផ្លូវការ៕